Язык сайта Язык сайта

Ақпарат

Әкімшілік мемлекеттік лауазымға орналасу конкурстық негізде жүзеге асырылады.

Конкурс конкурсты өткізу туралы хабарландыру жарияланғаннан кейін  бос лауазымдары бар мемлекеттік органмен өткізіледі және мынадай кезенңдерді қамтиды: 

  1. Заңнама бойынша білімін тестілеу  
  2. Жеке басының қасиеттерін бағалау   
  3. Бейінді білімі бойынша мемлекеттік органда әңгімелесу 

Мемлекеттік қызметке алғашқы рет түсетін және жұмыс тәжірибесі жоқ үміткерлер өз кәсіби қызметін жалпы конкурс бойынша төменгі лауазымдардан бастайды. 

Мемлекеттік қызметке түсетін адамдар мынадай талаптарға сай болуы тиіс: 

  1. Қазақстан республикасы азаматтығына ие болуы қажет;
  2. егер республика заңнамасында тиісті лауазымдарға қатысты өзгесі белгіленбесе, он сегіз жастан жас болмауы қажет;
  3. қажетті білімі мен кәсіптік даярлық деңгейіне ие болуы және белгіленген біліктілік талаптарына сай болуы тиіс.

Орталық мемлекеттік органдарда және олардың аумақтық бөлімшелерінде конкурс өткізілген кезде, хабарландырулар «Казахстанская правда» және «Егемен Қазақстан» газеттерінде жарияланады. Жергілікті мемлекеттік органдарда конкурсты өткізу туралы хабарландырулар тиісті әкімшілік-аумақтық бірлік аумағында таратылатын мерзімді баспасөз басылымдарында жарияланады.  

Халықты хабарландыру мақсатында Агенттіктің kyzmet.gov.kz  сайтында арнайы «Аттестаттау» бөлімі ашылды. 

Оның үстіне, тегін 1424 call-орталығы жұмыс істейді, ол бойынша да қажетті ақпарат ұсынылады.

Қажетті құжаттар

Конкурсқа қатысуға ниет білдірген азаматтар конкурсты өткізетін мемлекеттік органға мынадай құжаттарды береді:

  1. Қағидаларға 2 қосымшаға сәйкес нысандағы өтініш;
  2. 3х4 үлгідегі  фотосуреті бар Қағидаларға 3 қосымшаға сәйкес толтырылған сауалнама;
  3. бiлiмi туралы құжаттардың нотариалдық куәландырылған көшiрмелерi;
  4. еңбек қызметін растайтын құжаттың нотариалдық куәландырылған көшiрмесi;
  5. № 086 нысаны бойынша денсаулығы туралы анықтама;
  6. Қазақстан Республикасы азаматының жеке басын куәландыратын құжаттың көшірмесі;
  7. құжаттарды тапсыру сәтінде қолданыстағы заңнаманы білуіне тестілеуден өткені туралы шекті мәннен төмен емес нәтижелері бар сертификат (немесе нотариалдық куәландырылған көшірмесі);
  8. конкурсқа қатысу үшін құжаттарды тапсыру сәтінде уәкілетті органда жеке қасиеттерін бағалауды өту туралы қолданыстағы қорытынды (немесе қорытындының нотариалдық куәландырылған көшірмесі).

Азаматтар бiлiмiне, жұмыс тәжiрибесiне, кәсiби шеберлiгiне және беделіне қатысты (бiлiктiлiгiн арттыру, ғылыми дәрежелер мен атақтар берiлуi туралы құжаттардың көшiрмелерi, мiнездемелер, ұсынымдар, ғылыми жарияланымдар және өзге де олардың кәсіби қызметін, біліктілігін сипаттайтын мәліметтер) қосымша ақпараттарды бере алады.

Мемлекеттік қызметке келесі азаматтар  қабылдана алмайды

  1. заңнамада тиісті мемлекеттік лауазымдарға қатысты өзге талаптар белгіленбесе, он сегіз жасқа дейінгі;
  2. сот әрекетке қабілетсiз немесе әрекетке қабiлетi шектеулi деп таныған;
  3. сот белгiлi бiр мерзiм iшiнде мемлекеттiк лауазымдар атқару құқығынан айырған;
  4. бiлiктiлiк талаптарында тиiстi мемлекеттік лауазымдарға орналасу үшiн денсаулық жағдайына арнайы талаптар белгiленген жағдайларда, медициналық мекеменiң қорытындысы негізінде лауазымдық өкiлеттiктердi орындауға кедергi келтiретiн ауруы бар;
  5. өзiнiң мәртебесiн және соған негізделген беделiн жеке басының, топтық және өзге де қызметтiк емес мүдделерге пайдалануға алып келуi мүмкін әрекеттерді болғызбау мақсатында өзіне Заңда белгiленген шектеулердi қабылдаудан бас тартқан;
  6. мемлекеттік қызметке кірер алдындағы үш жыл ішінде мемлекеттік қызметке кір келтіретін тәртіптік теріс қылық үшін тәртіптік жауаптылыққа тартылған азаматты қабылдауға болмайды. Бұл ретте мемлекеттік қызметке кір келтіретін тәртіптік теріс қылық үшін қызметтен шығарылған азамат мемлекеттік қызметке жіберілмейді;
  7. мемлекеттiк қызметке кiрер алдындағы үш жыл iшiнде сыбайлас жемқорлық құқық бұзушылық жасағаны үшiн сот тәртiбiмен әкiмшiлiк жаза қолданылған;
  8. сыбайлас жемқорлық қылмыс жасаған;
  9. мемлекеттік қызметке кiрер алдындағы үш жыл ішінде қылмыстық теріс қылық немесе онша ауыр емес және ауырлығы орташа қылмыстар жасағаны үшін соттың айыптау үкімі шығарылған немесе қылмыстық теріс қылық немесе онша ауыр емес және ауырлығы орташа қылмыстар жасағаны үшін өзіне қатысты қылмыстық жауаптылықтан келесі мән-жайлар негізінде босатылған
  • егер рақымшылық жасау актiсi жасалған іс-әрекет үшiн жаза қолдануды жойса, соның салдарынан;
  • қылмыстық жауаптылыққа тартудың ескіру мерзімінің өтуіне орай;
  • iс бойынша іс жүргізу өзіне медициналық сипаттағы мәжбүрлеу шарасын қолдану үшiн қажет болған жағдайларды қоспағанда, егер қылмыстық заң тыйым салатын іс-әрекеттi есi дұрыс емес күйде жасаған адамға қатысты болса;
  • қылмыстық қудалаудан артықшылықтары немесе иммунитетi бар адамды қылмыстық жауаптылыққа тартуға уәкiлеттi органның немесе лауазымды адамның келiсiм беруден бас тартуына байланысты;
  • Қылмыстық кодекстің ережелерiне байланысты қылмыстық жауаптылықтан босатылуға жататын адамға қатысты;
  • қылмыстық қудалауды жүзеге асырмауға мүмкiндiк беретiн мән-жайлар (Қылмыстық-процестік кодексінің 36 бабы). 
  1. мемлекеттiк қызметке кiру уақытына заңда белгiленген тәртiппен өтелмеген немесе алынбаған сотталғандығы бар;
  2. ауыр немесе аса ауыр қылмыстар жасағаны үшін бұрын сотталған немесе қылмыс жасағаны үшін қылмыстық жауаптылықтан 9) тармақта көрсетілген негізінде босатылған;
  3. қылмыстық топтың құрамында қылмыс жасаған;
  4. қылмыстық топтың құрамындағы қылмыс туралы өзіне қатысты қылмыстық істі қылмыстық қудалау органы немесе сот Қылмыстық кодекстің Ерекше бөлігінің тиісті бабында көзделген бас бостандығынан айыру түріндегі жазаның төменгі шегінің мерзімі өткенге дейін 9) тармақта көрсетілген негізінде тоқтатқан;  
  5. құқық қорғау органдарынан, арнаулы мемлекеттік органдардан және соттардан, әскери қызметтен теріс себептер бойынша шығарылған азаматты, сондай-ақ Қазақстан Республикасының заңдарында көзделген өзге де жағдайларда қабылдауға болмайды.

Мемлекеттік қызмет өтілін есептеу тәртібі

Мамандығы бойынша жұмыс өтіліне ұйымдық-құқықтық нысанына қарамастан ұйымдарда сол мамандығы бойынша жұмыс істеген барлық уақыты есептеледі, сондай-ақ:

  • сол мамандық бойынша мемлекеттік қызметте болған;
  • терiс себептермен қызметтен шығарылған адамдардан басқа, офицерлiк құрамдағы адамдардың, прапорщиктердiң, мичмандардың, Қарулы күштердегi мерзiмсiз қызметтегi әскери қызметшiлердiң, iшкi, шекара әскерлерiнде, Қазақстан Республикасы мен бұрынғы Кеңес Социалистік Республикалар Одағының азаматтық қорғаныс басқармалары органдары мен бөлiмшелерiнде, Қазақстан Республикасының Ұлттық қауiпсiздiк комитетi мен Кеңес Социалистік Республикалар Одағы Мемлекеттiк қауiпсiздiк комитетi органдары жүйесiнде, Қазақстан Республикасы мемлекеттік Күзет қызметiнде, Қазақстан Республикасы «Сырбар» сыртқы барлау қызметінде, Қазақстан Республикасының Республикалық Ұланында, Қазақстан Республикасының Ұлттық ұланында және әскери-тергеу органдарында мiндеттi әскери қызметiн өткерген;
  • Жүктілікке және бала (балаларды) тууға, жаңа туған баланы (балаларды) асырап алуға байланысты демалыстар, сондай-ақ заңнамаға сәйкес берілген бала күтімі бойынша жалақысы сақталмайтын  демалыс уақыты;
  • Қазақстан Республикасы Парламенті депутаттарының, Қазақстан Республикасы жергілікті өкілдік органдардың  өкілеттікерін жүзеге асырған;
  • егер қызметкер шетелге кетер алдында мамандығы бойынша мемлекеттік мекемеде жұмыс істесе және жолға кеткен уақытын есептемегенде, шетелден қайтып келген күнінен бастап екі айдың ішінде мемлекеттік мекемеге жұмысқа орналасса, шетелде жұмыс істеген;
  • жұмыстан заңсыз босатылып, кейіннен жұмысқа қайта орналасқан кезде еріксіз жұмыста болмаған;
  • егер қызметкер курсқа түскенге дейін мемлекеттік мекемеде жұмыс істесе және оны бітірген соң мемлекеттік мекемеге қайта оралса, оның кадрларды даярлау, қайта даярлау және біліктілігін арттыру курстарында мемлекеттік мекемелер жолдамасымен жұмыстан қол үзіп оқыған;
  • мамандығының бейіні бойынша ұйымдардағы ғылыми жұмыс;
  • 1999 жылғы 1 қыркүйекке дейін мамандығы бойынша интернатурадан және клиникалық ординатурадан өткен;
  • өзінің еңбек қызметі өткен қызмет саласына қарамастан, бірдей мамандықтар бойынша лауазымдарда жұмыс істеген;
  • әлеуметтік қамсыздандыру, білім беру және денсаулық сақтау саласында әлеуметтік, педагогикалық және медициналық мамандықтар бойынша лауазымдарда жұмыс істеген уақыты енеді.

Мамандық бойынша жұмыс өтілін анықтау үшін негізгі құжат еңбек кітапшасы (ол болса) немесе еңбек шарты не қабылдау және жұмыстан босату туралы бұйрықтардан үзінділер, қызмет тізімі болып табылады.  Қажетті  жазба болмаған не жұмыс кезеңдері туралы қате немесе дәл емес жазбалар болған жағдайда, еңбек өтілін растауға  анықтамалар,  дербес шоттар және  жалақы төлеу ведомосі және жұмыс кезеңдері туралы мәліметтерді қамтитын заңнамада көзделген өзге құжаттар  қабылданады. Мемлекеттік қызмет өтілін куәлардың айғақтарымен растау Қазақстан Республикасының заңнамасында белгіленген тәртіппен жүзеге асырылады.

 

Мемлекеттік қызметшілердің құқықтары мен міндеттері

Мемлекеттік қызметшінің құқықтары мен негізгі міндеттері Қазақстан Республикасының «Мемлекеттік қызмет туралы» Заңымен және өзге заңды актілерімен  регламенттеледі.

Мемлкеттік қызметшінің:

  • Қазақстан Республикасының азаматтарына Қазақстан Республикасының  Конституциясында және заңдарында кепiлдiк берiлетiн құқықтар мен бостандықтарды пайдалануға;
  • өзіне мәлім болған сыбайлас жемқорлық құқық бұзушылықтың анық жағдайлары туралы өзі жұмыс істейтін мемлекеттік орган басшылығының және (немесе) құқық қорғау органдарының назарына жеткізген жағдайда Қазақстан Республикасының заңнамасына сәйкес құқықтық және өзге де қорғалуға;
  • еңбегiнiң қорғалуына, денсаулығының сақталуына, қауіпсіз және тиімді жұмыс істеу үшін қажеттi еңбек жағдайларына;
  • әлеуметтік және құқықтық қорғалуға;
  • өзінің лауазымдық өкiлеттiктерi шегiнде мәселелердi қарауға және олар бойынша шешiмдер қабылдауға қатысуға, тиiстi органдар мен лауазымды адамдардың оларды орындауын талап етуге;
  • лауазымдық өкілеттіктерін атқару үшiн ұйымдарға белгiленген тәртiппен баруға;
  • басшыдан мемлекеттiк қызметшi атқарып отырған мемлекеттік лауазымға сәйкес мiндеттерді және лауазымдық өкiлеттiктер көлемiн дәл айқындап беруді талап етуге;
  • жеке басының қадiр-қасиетiнiң құрметтелуiне, басшылар, өзге де лауазымды адамдар және азаматтар тарапынан өзiне әдiл және құрметпен қарым-қатынас жасалуына;
  • өзi атқаратын мемлекеттік лауазымға, жұмыс сапасына, тәжiрибесiне және осы Заңда белгiленген өзге де негiздерге қарай ынталандырылуына және еңбекақы төленуiне;
  • тиiстi бюджет қаражаты және Қазақстан Республикасы Ұлттық Банкінің қаражаты есебiнен даярлануға, қайта даярлануға және бiлiктiлiгiн арттыруға;
  • мемлекеттік орган оны Қазақстан Республикасының заңнамасына сәйкес жоғары оқу орнынан кейінгі білім беру бағдарламалары бойынша мемлекеттік тапсырыс шеңберінде оқуға немесе тағылымдамадан өтуге жіберген жағдайларда, сондай-ақ Қазақстан Республикасының заңдарында көзделген өзге де жағдайларда жұмыс орнының (мемлекеттік лауазымының) сақталуына;
  • өзiнiң мемлекеттiк қызмет өткеруiне қатысты материалдармен кедергiсiз танысуға, қажет болған жағдайларда жеке түсiнiктемелер беруге;
  • бiлiктiлiгi, құзыреттері, қабілетi, сiңiрген еңбегi және өзiнiң лауазымдық мiндеттерiн адал орындауы ескеріле отырып, мемлекеттік қызмет бабында ілгерілетілуге;
  • мемлекеттік қызметшiнiң пiкiрiнше негiзсiз айып тағылған жағдайда қызметтiк тергеп-тексеруді талап етуге;
  • сыбайлас жемқорлық құқық бұзушылық үшін не мемлекеттік қызметке кір келтіретін тәртіптік теріс қылық үшін оның жауаптылығын қарау жағдайларын қоспағанда, мемлекеттiк қызметтен өз қалауы бойынша шығарылуға;
  • зейнетақымен және әлеуметтiк қамсыздандырылуға;
  • лауазымдық өкілеттіктерін атқару үшін қажетті ақпарат пен материалдарды белгіленген тәртіппен алуға;
  • жоғары тұрған мемлекеттiк органдар мен лауазымды адамдарға мемлекеттiк қызметтi жетiлдiру жөнiнде ұсыныстар енгізуге құқығы бар.

Мемлекеттiк қызметшiлер:

  • Қазақстан Республикасының  Конституциясын және заңнамасын сақтауға;
  • Қазақстан Республикасының Президентi  бекiткен тәртiппен мемлекеттiк қызметшiнiң антын қабылдауға;
  • азаматтар мен заңды тұлғалар құқықтарының, бостандықтары мен заңды мүдделерiнiң сақталуын және қорғалуын қамтамасыз етуге, олардың өтiнiштерiн Қазақстан Республикасының заңнамасында белгiленген тәртiппен және мерзiмдерде қарауға және олар бойынша қажеттi шаралар қабылдауға;
  • функцияларын өздерінің лауазымдық өкілеттіктеріне сәйкес жүзеге асыруға;
  • лауазымдық өкілеттіктерін жүзеге асыру кезінде саяси партиялардың, қоғамдық және діни бірлестіктердің қызметінен бейтарап және тәуелсіз болуға;
  • қызметтік тәртiпті сақтауға;
  • Қазақстан Республикасының  заңдарында белгіленген шектеулердi сақтауға;
  • қызметтік әдепті сақтауға;
  • басшылардың бұйрықтары мен өкiмдерi, жоғары тұрған органдар мен лауазымды адамдардың шешiмдерi мен нұсқаулары олардың лауазымдық өкілеттіктері шегiнде шығарылған болса, оларды орындауға;
  • мемлекеттiк құпияларды және заңмен қорғалатын өзге де құпияны сақтауға, оның iшiнде мемлекеттiк қызметтi тоқтатқаннан кейiн заңмен белгiленген уақыт iшiнде сақтауға, ол жөнiнде қолхат беруге;
  • лауазымдық өкілеттіктерін атқару кезiнде алатын, азаматтардың жеке өмiрiн, ар-намысы мен қадiр-қасиетiн қозғайтын мәлiметтердi жария етпеуге және Қазақстан Республикасының заңдарында көзделген жағдайларды қоспағанда, олардан мұндай ақпарат берудi талап етпеуге;
  • мемлекеттiк меншiктiң сақталуын қамтамасыз етуге, өзіне сеніп тапсырылған мемлекеттiк меншiктi қызметтiк мақсаттарда ғана пайдалануға;
  • өздеріне мәлім болған сыбайлас жемқорлық құқық бұзушылық жағдайлары туралы өздері жұмыс істейтін мемлекеттік орган басшылығының және (немесе) құқық қорғау органдарының назарына дереу жеткізуге;
  • лауазымдық міндеттерін тиiмдi атқару үшiн өзiнiң кәсiби деңгейi мен біліктiлiгiн арттыруға;
  • өздерін жоғары оқу орнынан кейінгі білім беру бағдарламалары бойынша мемлекеттік тапсырыс шеңберінде оқуға жіберген мемлекеттік органда тікелей оқу аяқталғаннан кейін, сондай-ақ уәкiлеттi органның ұсынуы бойынша Қазақстан Республикасының Президентi  айқындаған тәртіппен және мерзімдерде мемлекеттік қызметте жұмыспен өтеуге мiндеттi. Осы міндеттемені орындамау мемлекеттік қызметшінің мемлекетке өзін оқытуға бөлінген бюджет қаражатын және оқумен байланысты шығындарды орындалмаған міндеттемелерге бара-бар өтеуіне әкеп соғады;
  • Қазақстан Республикасының заңнамасына сәйкес мемлекеттік органның ақпараттық ресурстарымен жұмыс процесінде ақпараттық қауіпсіздікті қамтамасыз етуге міндетті.